【新增動新聞】
正當大家慶祝聖誕之際，效力阿仙奴期間、年薪過百萬英鎊嘅右閘伊保爾，竟然要過lonely Christmas？目前已經34歲伊保爾，日前接受傳媒訪問時哭訴，同比利時籍白人妻子Aurelie離婚鬧到要上法庭，法庭唔單止將佢嘅資產判予前妻，仲要唔畀佢見自己啲仔女，由昔日嘅千萬富翁變成今日嘅「窮光蛋」，伊保爾仲一度諗過自殺㖭！目前佢惟有希望前球會阿仙奴，可以畀佢撈到一官半職，畀到佢繼續生存嘅希望咁話。

「我踢波賺到嘅錢，全部都交晒畀Aurelie打理，佢嗌我簽乜就簽乜，因為佢係我老婆。」結果佢地離婚後，法庭將伊保爾嘅財產，判晒畀前妻Aurelie，搞到佢已經冇錢喺身：「我好驚我可能要賣衫先可以生活，仲有唔知幾時會有差人上嚟封屋，有時我要熄燈，唔想畀差人知道我喺入面，或要到朋友屋企瞓地下。」

不過伊保爾並唔甘心，就咁放棄自己嘅身家：「我已經唔夠錢請律師，但我唔會就咁罷休，明明所有野都係我嘅，間屋都係我嘅，我會抗爭到底！因為實在太唔公平喇！」今個聖誕節，伊保爾唔只老婆唔要佢，就連佢三個分別14歲、12歲同9歲嘅仔女，都已經半年無同伊保爾聯絡。

「我以前成日同雲格傾計㗎！不過後嚟我部電話唔見咗，就聯絡唔到前隊友喇。」目前要淪落到去農場打工嘅伊保爾仲話：「我好羨慕亨利可以係電視上講波，如果阿仙奴可以畀到一官半職我做，我可以將我嘅經驗傳畀年輕球員，就算只係最基層嘅打雜，我都唔介意架！」

值得一提嘅係，土耳其媒體係早前曾經爆料，話伊保爾患埋愛滋病，但相關消息至今仍未得到證實，唔知道雲格或亨利聽到伊保爾咁慘，會唔會出手幫忙呢？

--------------------
狂賀！BFB系列推出5周年，精彩活動為您安排，立即登入速享專屬優惠！ http://bit.ly/2xrTKGM