水貨客攻陷上水火車站，政府做完大龍鳳又故態復萌，網民再次喺facebook搖旗叫人23號到場二度光復，點知惹嚟猶如孔慶東接班人嘅中大內地生留言破口大罵港人係「港狗」，結果當然好似孔慶東咁紅遍網絡，全面被人肉起底，內地生最終向港人say sorry，冇好似孔慶東咁堅持到底。
呢位自稱叫張文昌嘅內地生，報稱就讀中文大學，網民起底組搵到佢讀大二，副修金融工程，本身嚟自重慶市雲陽縣，喺當地攞過獎學金，算係尖子。
讀書叻唔代表有禮貌，佢去facebook踩場劈頭就鬧港人係「一群低素質的東西」，「只知道用SB（內地粗口）的行為證明自己的民主」，最火燒心梗係嗰句「港狗」，孔慶東嗰副醜惡嘴臉即刻出晒嚟。

被起底後say sorry

明明讀緊中大，佢竟然話「香港學位沒多大說服力；哥沒去清華北大本身就是一個錯誤」，甚至話不屑做香港永久居民，態度之囂張，同孔慶東有得揮㗎。
據聞有網民搵到佢嘅手提號碼，打去狂鬧，又攻陷佢嘅facebook，搞到張同學噚日一早就喺facebook道歉，話自己過激，重申希望中港團結。佢回覆八方查詢時就強調佢嘅言論絕無任何針對性。中大證實呢個係佢哋學生，亦留意到有中大生作出冒犯言論，感到遺憾，引述呢位同學已親自send email畀校長沈祖堯道歉，希望大家多多包容喎。

mailto:[email protected]