當年今日
關於我們

【全職媽咪】趙海珠股市獲利 自認保守:唔貪心,賺到就算

蘋果日報 2015/04/20 06:00

蘋果張燊悅股市趙海珠麥玲玲丁蟹效應GreenMonday曹敏莉即時新聞之花

曹敏莉、「前新聞之花」趙海珠、張新悅、麥玲玲等今日喺灣仔出席GreenMonday首間GoGreen概念店開幕。

曹敏莉透露自己係一位少肉者,兩年前陀住囝囝嘅時候,開始唔想食肉,所以冇食雞牛豬,但就會食少少海鮮,佢話:「我享受呢個過程,可能會慢慢唔食海鮮,為環保又好,為健康又好。」老公同你一齊唔食肉呢﹖曹敏莉話:「我冇叫佢哋唔好食,但一日三餐都我煮,煮少咗肉,相對地會食少咗,不過我發現囡囡唔太鍾意食肉。」曹敏莉表示正籌備online珠寶,下月九日慧妍雅集有個晚宴,屆時佢會捐出零售價五萬二千元嘅珠寶。

目前做全職媽咪嘅趙海珠,問到有冇睇最近股市﹖佢話:「冇得點睇,呢幾日好浮動,一陣又話內地有唔同消息,搞到股市好飄忽,其實早兩個禮拜都升咗好多,有獲利都應該有獲利,當然我身邊嘅人比較進取啲。」問佢信唔信「丁蟹效應」﹖佢笑住話:「我信自己,控制自己風險緊要過外圍。」

趙海珠表示冇幫家人或者朋友買股票,佢話:「之前有買,但依家我冇買,因為佢升咗之後,個個都話要調整,我係保守嘅投資者,我就驚喇,升到又高,所以我放咗少少貨,賺咗五位數字,我唔貪心,賺到就算。」