今季矢志挑戰莫雷拉冠軍地位的潘頓，目前落後雷神九W。為免被潘頓追貼榜首，雷神必須好好把握機會，盡量贏多些頭馬，以拋離對方四連冠進發。

剛周日（18日）沙田賽事，大摩賽後自爆雷神少有地主動索騎「人民武士」，結果人馬順利取勝，反映雷神為了保住冠軍寶座，季內餘下時間積極爭取實力座騎。

後晚（21日）快活谷賽事，雷神騎足八場，當中一半屬新接手座騎，出戰第四場四班1200米呂廐「金碧輝煌」，此馬在谷草賽績可靠，雷神早前初接手呂廐「一支梅」順利熱食，前駒有權照辦煮碗，初配雷神即擦出火花。

呂健威今季成績不俗，暫贏27場居練馬師龍虎榜第五位，而「金碧輝煌」季內已取兩W兩 P，贏馬及上名路程均為谷草1200米，堪稱路有專長。

此駒回升四班後近兩仗仍可打叠上名，反映本身年屆七歲，評分未飽和，剛戰配何澤堯排10檔，臨場仍敢落飛至14倍開跑，結果全程三叠蝕位，以個半馬位不敵貼欄慳位衝贏之「勇者勝」，表現仍算有說服力。

難怪復課後即被雷神青睞，上周四（15日）已過檔親試，今晨（19日）再跳快工夫，課罷騎練企埋一齊密斟良久，睇埋動態突顯此路人馬攻堅決心，實行執多場才收手。