香港大學專業進修學院嘅九龍西分校暨中醫臨床中心及中藥房噚日開幕，喺福布斯富豪榜全球排名462位嘅利豐（494）主席馮國經，身兼香港大學校務委員會主席，當然要現身撐場啦！同場仲有近期飽受「港大陳冠希」事件影響嘅港大校長徐立之，同埋幫過國泰（293）同電盈（008）打工嘅張永霖。

參觀標本最好奇

馮國經同徐立之兩人關係有幾好？睇佢哋有幾玩得就知！華華記得冇幾耐之前，徐校長喺一次演講台上，手提電話忽然響起，佢就借馮國經過橋，賴係對方打畀佢。噚日馮國經見到徐校長，唔知係咪有心整蠱番佢，抓起中藥就叫徐校長試食！
話說噚日開幕禮儀式完咗，大會安排咗所有嘉賓同記者行家參觀間學校，第一站去佢哋個中醫藥實驗室，畀大家睇吓各種中藥標本。馮國經眼見咁多中藥放喺面前，即刻變咗個充滿好奇心嘅小學生，每樣中藥都攞嚟睇吓聞吓，當示範嗰位教授話，檳榔可以就咁食，馮生變咗個佻皮嘅小朋友，一手抓起一大堆，遞畀側邊嘅徐校長叫佢食。

燒豬要一切到尾

查實馮國經噚日一到埗就好high，喺切燒豬儀式時，佢一見到隻燒豬就好興奮，同各位嘉賓一齊落刀切燒豬嗰陣，仲大叫「切到尾！」十足大細路咁！切完燒豬到祝酒儀式，當各位嘉賓都攞咗杯香檳之後，佢又好開心咁大叫「Cheers！」咦，唔知馮生係咪食咗乜嘢中藥，所以咁興奮？
不過玩還玩，馮國經做嘢幾投入都不忘愛妻，當佢參觀中醫藥圖書館時，見到一本港大出版嘅中醫書，好有興趣咁攞嚟睇，公關大員好識做，即刻送本畀佢，馮國經就話：「等我送畀我太太先！」嘩！辦緊公事都咁有老婆心，抵馮生你做到富豪！
電郵：mailto:[email protected]