at17噚晚喺伊館舉行最後一場演唱會，盧凱彤（Ellen）同林二汶嘅好友，何韻詩、黃耀明、許鋌鏗、胡鴻鈞、顏卓靈前來欣賞，仲有盧凱彤太太余靜萍都有來撐場。at17唱到第二首歌，所有觀眾已經興奮得企起身，唱到《窮得只有愛》，佢兩個仲行落台同粉絲握手，見到嘉賓朋友就抱擁，顏卓靈仲特別興奮。

其間at17喺台上深情對話：「我哋分開7年，分別係盧凱彤同埋林二汶個騷入面都係見番同一班觀眾，所以你哋覺得我哋好似冇分開過。」之後二汶不停搞爛gag講笑話：「一分開就搵到個拍檔，嗰個係林一峰，伊館開完去紅館，我哋兩個拆伙係因為林一峰，但係我哋認識組合都係因為林一峰。」Ellen就話：「咁我哋復合呢度就要完。」Ellen仲大讚林一峰係好叻，二汶最叻係認叻：「我哋14歲開始識，俾哂最精彩青春俾哂二汶，燃燒青春係燦爛。」二汶突然又好感性話：「我今日好感性，多謝你(Ellen)係最艱難嘅時候冇放棄過我，多謝你咁愛我。」然後佢兩個拖手，二汶錫咗Ellen手背一啖。

之後二汶講番佢兩個拆伙爭歌，佢話：「拆夥之後，出現爭歌情況，兩個各自搵歌，聽番啲舊demo，想要首歌，打俾盧凱彤問係咪我寫，原來係盧凱彤寫，不如俾我喇，盧凱彤話俾佢諗一日，收線我就心都碎喇！拆咗夥之後，真係要爭歌，第二日佢話可以用，事後先知，佢準備將首歌放落自己唱片度，所以要抽起首歌，將成盤計劃改來就我。」Ellen回應話「我為咗你咩都得。」喺唱聖誕歌嘅時候，二汶再抱起Ellen轉咗兩個圈，然後錫咗Ellen塊面。最後Encorea位，佢哋再唱《始終一天》，然後同觀眾一齊影咗張大合照。

完騷後at17接受訪問，Ellen被讚唱歌進步咗好多，佢話：「係呀！之前有上山練唱歌，因為之前做咗一個通鼻塞手術，學唱歌學咗好多年，一路進步緊。」係咪因為結婚之後開竅？「係呀！覺得個人昇華咗，覺得自己表現係100分。」Ellen台上講到助手煲湯，佢話：「因為太太同我都唔識煲，但係佢有幫我按摩，因為結他手有好多勞損。」咁二汶錫你，太太會唔會呷醋？Ellen話：「唔會，太太聽到二汶，艱難日子冇放棄，落台佢都有錫二汶，咁我使唔使呷醋？太太好明白。」

問at17想唔想開part2？佢哋話：「未傾，都想，不過之後都會各自出碟，今次個騷好多回憶。」問佢哋有冇紅館有入紙，佢哋話：「有，但係被拒，今次因為係at17，15周年，所以堅持2017係伊館開騷。」

更多娛聞，喺晒《娛果》
http://fb.com/appledailyent