剛出咗隻新碟《LoveisLove》嘅Sammi鄭秀文，噚晚冬至於網上貼po寫道:「冬至快樂。珍惜身邊所有的愛。愛什麼都好，愛就是愛；不問什麼。不為什麼。不怕什麼。LoveisLove!!!!」一來係食正自己新碟個名，二來，都係佢嘅感情寫照。剛過去嘅冬至，聽晚平安夜聖誕夜除夕夜，Sammi身邊，都有佢——許志安。

之前Sammi間屋俾大業主收樓無屋住，又未搵到樓，心急做新郎哥的安仔，即刻借位，叫Sammi搬去佢干德道住住先。兩人強調係同屋但不同房。不過後來Sammi後來表示已經搬離許家，搬咗去新屋；今日就有報道話，許志安家陣晚晚到Sammi新居報到，幫手做家務，二人不時耍花槍，好sweet喎。

Sammi早前喺電台訪問中透露，話兩人已經「分居」、並搬回96年買入，巿值4千幾萬嘅2400百呎淺水灣海峰園豪宅，但係安仔不甘寂寞，借意安排愛犬同Sammi同居，趁一有時間就上Sammi新居探狗狗，實質當然係探Sammi啦。

據報道所見，安仔每日定時傍晚就上到Sammi屋企，身份就好似男主人咁，同外傭一齊幫手折紙箱執嘢。當中一晚Sammi喺屋企執咗大半日，一臉疲累嘅Sammi就向喺屋企嘅安仔指手畫腳，唔知係發號司令定係喺度撒嬌，安仔就靜心聆聽Sammi發勞騷，之後仲張開雙手，將Sammi一攬入懷，安仔出冧招，成功撲熄Sammi不滿，Sammi即刻面露歡顏，繼續乖乖執屋。

現年46歲嘅許志安，同41歲Sammi，自前年復合後更珍惜大家，近年經常傳出好事近，今年二月，兩人更被指到沖繩試婚和物色結婚場地。同年三月，Sammi帶父母和胞弟跟安仔於大坑嘆日本菜，未知是否商討結婚大計。安仔離開時更細心扶住Sammi行動不便嘅爸爸，上車後又幫手扣安全帶，有準女婿無微不至照顧，鄭爸爸笑到見牙唔見眼，Sammi看在眼裡，應該也感受到吧。