王菲謝霆鋒世紀復合，之後各自現身開工，春風滿面，更有報道話之後鋒菲合體去美國探靖童，霆鋒哥哥仲幫手舖路，引薦童童加入樂壇。不過呢，到依家都仲未見鋒菲再度一齊被拍喎……

唔使擔心。自從上月底爆出兩人復合之後，內地傳媒已經盯實佢兩個，睇下幾時又有sweetsweet錫面珠或者《14道鋒味》(王菲專用版)。而喺本月初，原來霆鋒又去咗王菲位於北京嘅香閨「蝸居」。

本月3日，霆鋒啱啱由甘肅錄完節目，去咗北京會合王菲。一身灰色外套牛仔褲，腳步輕快，梗係，約咗女友呀嘛。

霆鋒一落機，即離開機場，一路緊握手機，你可以當佢同王菲隔空傳情或者講緊電話啦。跟手霆鋒就坐車車去到王菲位於東三環亮馬橋外交公寓，亦即係上次被偷拍到復合嘅香閨。

自從上次俾偷拍後，王菲寓所換晒保安，進出更加嚴格。咁霆鋒呢？佢自從3號去咗王菲屋企之後，一連幾日，都冇出過門喎！

上次密室談心四日，唔出街因為兩人都深閨，而且一出街都係難免被拍，所以都係留喺屋企安全啲啲啦。

此外，劉嘉玲同毛俊輝今日出席一個活動，提到佢好友王菲同謝霆鋒，劉嘉玲早排因為工作去咗北京，但係就冇同老友王菲見面，仲爆料話反而見到霆鋒，佢哋見面嘅時候，嘉玲反問霆鋒點解去得北京都好頻密。嘉玲話：「我問佢做乜嚟北京咁密，但佢只係甜笑。」

雖然佢同王菲有見面，但係有互相用訊息聯絡，但時佢哋兩個都未有時間坐低傾偈，亦唔知道佢哋「鋒菲戀」嘅發展。另外，有傳聞王菲懷孕，嘉玲表明唔信傳聞，但係話：「neversaynever，咩事都會發生，只要朋友開心就得，唔通唔想朋友開心咩？」