港版國安法︱胸中實彈 曾志健剖白第二次生命：要把握做有能力做嘅事
蘋果日報 2020/12/22 15:35
曾志健暴動警察
曾志健（健仔）去年10.1在荃灣被警察實彈近距離開射一幕，港人歷歷在目。距當日倒地一刻已逾年，子彈雖被取走，但他直言胸口間中的陣痛，令他陰霾揮之不去，也坦言道「僥倖仲生存到，我當做第二次生命，要把握做有能力做嘅事。」
記者 鄧溢禧
中槍如此深刻，心中可有恨意？曾志健不諱言「憎」開槍警員，接着又道，回想當日會中槍，全因心中滿滿怒氣才落入險境，代價有目共睹。雖然「憎」開槍警，但說與其「憎恨一個敵人對自己毫無好處」，倒不如趁尚有自由的時間，憑理性做事。
現年19歲的抗爭者曾志健（健仔）說：「呢次咁僥倖仲生存到，我當做第二次生命，要把握做有能力做嘅事。」李子健攝
敢衝源於憤怒 也始於抑鬱
曾志健認為這股怒氣非一朝一夕，或者一條送中條例而成。回想童年，沉默寡言的他常被形容為反叛青年，但他從不認同，只覺自己討厭墨守成規，矛盾亦成為與家人越走越遠的起點。
他續說少時身為校隊籃球員，同時兼顧到成績不俗，卻依然被擁傳統思想的父母強迫上補習班，禁止打波，「直至升中四揀科，問題更加劇，令我做唔到自己，更令我患上抑鬱症」。
「我患上抑鬱症係因為我冇咗自由，所以我好清楚，冇咗自由係最可怕嘅事」，他指去年6.12嗅着攻鼻的催淚煙，面對政權咄咄逼人，才會步步走上街頭。他承認會懼怕受傷和被捕，仍無悔為社會多走一步，「唔知自己算唔算得上勇敢，只知自己做（抗爭）嘅話，都有成功同失敗，唔做就唔會有成功呢個選項」。
去年10.1一場荃灣示威中，健仔被警員以實彈近距離射中左胸倒地。李子健攝
想做就做 珍而重之的自由
自由逐秒在倒數。曾志健因子彈傷及胸、肺和肋骨，在背闊肌開刀取碎片的手術令其背部弱化萎縮，故他在疫情之下，相比組隊打籃球，他培養出健身興趣。他又指子彈傷及神經，部份在體內壞死，不時仍會傳出陣痛，據醫生估計至少維持數年；然而無傷及重要器官他說已是萬幸。
曾志健又提到，僥倖生存後的日子他已視之為第二次生命，會把握機會做能力所及的事，續說想做的事就去做，也算是他崇尚的一種自由，最珍而重之的自由。
健仔認為想做就做，也算是他崇尚的一種自由，最珍而重之的自由。李子健攝
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！