噚日打開報紙，嗰頭A1頭條講本港富豪身家大蒸發，揭去B1就講對冲基金賺錢、互惠基金跑贏大市。我同蘋果波神當然唔係索羅斯、畢菲特，但都希望喺逆市中搵到條好路同大家一齊行。
唔係晒命，小弟最近貼正路波衰到貼，但喺本欄就偶有佳作，上周推介阿積士[半和]、史篤城勝同埋史篤城「主/主」都不辱使命，博曼聯史高斯「首球」就退款收場，以扒冷嚟講有贏冇輸都算有交代啩？今次再接再厲，照辦煮碗先貼場「半場主客和」。

班拿約滿場飛「首」選

我鎖定德甲波琴半場能夠頂住主場長勝師禾夫斯堡，係因為禾堡近仗擺明踢後勁，好多時半場都未領先甚至先落後；波琴上場贏卡爾斯魯厄反底，打道氣博其半場領先，5.7倍夠冷喇啩？全場就冷吼和波。蘋果波神熟英甲，我都有揸拿，尤其長跟伊奧維動向，可惜對諾咸頓場波因惡劣天氣改期，所以就轉攻法甲。南錫主勝率唔算高，歐塞爾雖然差但上場和波止跌，博和合理。「半全場」就博主隊先落後，好辛苦至追番。
成段稿都冇人氣，唔得，今次再攻「首球」，睇開我寫稿嘅話，都知我對利物浦嘅班拿約有好感（AC簽到就好囉），謝拉特缺陣佢可能有份出鬥老樸，呢類滿場飛球員隨時先拔頭籌。
文：藍鑽石