【韓流】唔止李洪基 鄭亨敦都視喬妹做理想型

蘋果日報 2017/08/22 10:00

宋慧喬鬼怪夜市李洪基鄭亨敦

眾所周知韓國男團FT Island主音李洪基嘅理想型係宋慧喬,之前喬妹宣佈會同宋仲基喺10月結婚,令李洪基好鬼傷心,仲話要掉咗喬妹樣嘅攬枕。
雖然喬妹將會結婚,但理想型始終係理想型,所以李洪基喺前日播出嘅JTBC綜藝節目《鬼怪夜市》上就談及喬妹,並自爆雖然因為工作現身過唔同活動,但原來佢一直冇喺公開場合見過喬妹。而同場嘅鄭亨敦都直認自己嘅理想型係喬妹,佢哋仲向喬妹發出邀請,希望喬妹可以上佢哋個節目。
同時李秀根仲話要拜託車太鉉,帶自己出席10月雙宋嘅婚禮,即時被鄭亨敦寸佢同雙宋冇交情,亦都冇獲雙宋邀請,點解要出席人婚禮。