荷李活電影《非常盜2》（NowYouSeeMe：TheSecondAct）拍攝隊伍上星期殺到澳門取景，要角之一嘅謝西艾辛堡（JesseEisenberg）、活地夏里遜（WoodyHarrelson）、DaveFranco等今日繼續喺澳門拍攝。

下午3點左右，佢哋喺澳門果欄街附近拍一場戲，有臨時演員試位，之後正式演員先出嚟拍幾位演員喺後巷行出嚟上樓嘅戲份，當中仲有前亞視藝員黃集鋒(改名黃竣鋒)跟喺後面，應該係做類似保鏢角色。早前佢都話跑完慈善賽就會過澳門拍片，佢o依家以動作演員身份重新出發，唔知今次佢會唔會好似之前陳冠希喺西片《蝙蝠俠——黑夜之神》入面，有幾秒出鏡呢?

《非常盜2》導演朱浩偉今日呢段戲拍咗6至7個shot先收貨，大約4點演員就行返休息室，現場指示邊度係休息室同洗手間都十分清楚，拍攝時更有航拍機，未知係做makingof定係電影一部份。

4點幾有幾個鋪頭員工指攝製隊阻街，仲話:「拍戲大晒咩!」佢哋話唔俾車入冇問題，但人行都要管就唔得。