古語有云，食君之祿，擔君之憂。為人臣者，無論位極人臣、或卑微如閹人，一樣時刻謹記自己食君之祿，就要為皇帝分憂。收咗課金，工夫當然要做足。

史上不少太監閹人身無長物，靠拍靚皇帝個龍屁步步高升，漸現狼子野心；亦有啲「奇人」聞屁香聞到神志不清，以為自己可擁兵自立；但好奇怪，佢哋午夜夢迴，仍然念念不忘嗰句：「食君之祿……」。

香港警察隊員佐級協會主席林志偉噚日（15日）出席第24屆協會執行委員及單位代表就職典禮，散仔又好大總統又好，一場嚟到，上台講幾句振軍心，必須。好用唔用，林大總統偏偏用「食君之祿」呢句，唔係講自己，而係批評一班「每月領取政府俸祿，另一方面又打着反中亂港旗號與政府及市民為敵」嘅公職人員。唔通林大總統都覺得國家主席習近平同特首林鄭月娥，係「習帝」同「娥后」？不過納稅人睇到呢度，應該最傷心嘞，事關每年都要被逼課金畀呢班「認錯主人」嘅所謂公僕。

林大總統一開始，先擦吓公務員事務局局長聶德權隻鞋、引用局長嘅「公務員雙重身份」偉論表示認同，話公務員，包括警務人員，都係「國家公務員之一」，對維護國家安全匹夫有責。

玩割席分化
「發現瘀血要立即清除」

咪以為林大總統準備率3萬大軍去中印邊界「護國」，佢監生將話題一扭，扭咗去「分化」，話：「團結當然重要，但所謂『道不同，不相為謀』，對於有個別公職人員一方面每月領取政府俸祿，另一方面又打着反中亂港旗號與政府及市民為敵，我實在無法認同他們的工作會對社會有所裨益，亦難以將他們視為共同乘風破浪，向前邁進的夥伴。」

黃絲日日話和勇不分，林大總統呢位散仔協會之首偏偏玩割席，去到咁盡相信聶局長聽到又手震。大總統又話：「管理法則無異於養生之道，一旦發現瘀血便要立即清除，待瘀血擴散時只有後悔莫及。我奉勸這小撮『食君之祿，增君之憂』的人，不如早日以體面的方式自己離開政府，無謂招你們的同路人白眼，忍辱負重去賺取你們不配擁有的人工。」

散仔協會成員同其他公務員可能真係有少少唔同。公務員出糧，係因為有做嘢，俾上司鬧係份糧包埋，至於呃唔呃OT就好個人嘅；散仔協會呢，逗份人工，乜原來係講個「忠」字。為君擔得越多，坐得越穩。

至於林大總統講嘅「清除瘀血」，好自然就令人諗起一班知法犯法嘅「販冰兵」同僭建霸地嘅警隊高層。總統呀，PK鄧話晒都係你上司，人哋都未話要「清除瘀血」，「訓斥」之嘛；你咁快玩割席，會唔會over咗？

叫班散仔唔好妄自菲薄

總統仲話，警隊嘅共同目標係守護香港，「只要軍隊上下保家衞國嘅心足夠堅定，反敗為勝的奇蹟就會出現」，仲呼籲散仔會各位會員唔好將自己嘅工作同角色放大，「不要妄自菲薄，亦不要妄自尊大」。由佢把口講出嚟，幾有說服力？

-----------------------------
反送中一周年，《蘋果》整理大量涉及警察濫暴濫權等資料，製成詳盡資料庫，請按此閱讀圖表版本 ／純文字版本
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
App內1-Click訂閱《蘋果動新聞》
按此了解更多