一家大細行個小山輕輕鬆鬆，如果要顧埋愛犬，不妨去塔門走一趟。



落船，踏上這個西貢以北的小島，可以順時針繞圈行：進入靜中帶旺的小巷，民以食為天，小小貼士！一定要趁午膳前夕先飽肚，皆因馳名的海膽炒飯、炸墨丸、「無冰」凍奶茶……話明係必食之選，當然人人搶在午市開飯；撞埋一齊上菜，分分鐘有排你等！



醫好肚，甫出店外即有塔門出產的海味賣，唔想袋住手信上路，倒不如留待臨走上船才掃貨。



走過道建於明末清初、有400餘年歷史的天后古廟，下一站：山頂觀海亭！

好想煩惱一掃而空，觀海亭四周的遼闊草原幫到你：小朋友東奔西跑、愛犬通處放電、就連島上牛牛都無你咁好氣慢慢嘆草！動靜皆宜，遇着周末假期，營幕帳篷隨處有，順便記住塔門另有一個名字叫草洲「Grass Island」。



如果想「玩險」，不妨再向北往「龍頸筋」。眼前盡是白堊系的火山凝灰岩，岩層都有一億年歷史。奇石屹立大海，每當海浪湧至激起浪花，配上陽光映照，你需要做的是：快按快門快打卡！（小心碎石、新手切勿胡亂攀爬）
 


回程！依山徑漫步往碼頭，途中即可看到岸邊兩塊呈「呂」字形、上下堆疊起的方石，當然又係一個靚靚打卡位。



真係最後：走過塔門漁民新村返抵碼頭。掃手信的同時，或會閃起一個念頭：塔門都幾似一個世外桃源。反問自己，日常生活一個「忙」字，如果過活無「心」經營，便只得一個「亡」字。

路線：塔門碼頭 > 海傍街 > 山頂觀海亭 > 龍頸筋 > 疊石 > 塔門碼頭（6小時︰hea遊+影相+休息）


（備用地圖 http://www.discoverhongkong.com/common/images/see-do/great-outdoors/maps/map_tap-mun.pdf）

去程交通：

九巴 94號

上車：西貢市中心

落車：黃石碼頭

翠華
渡輪
上船：黃石碼頭

落船：塔門



回程交通：

翠華渡輪

上船：塔門

落船：黃石碼頭


九巴 94號

上車：黃石碼頭

落車：西貢市中心

專欄作者簡介：
Sanyz@HKD
H = Hiking（遊山玩水）
K = Knowledge（增進知識）
D = Discovery（自我發現）
上山啓發生活再改進社會。

Facebook link：
https://www.facebook.com/hkd.sanyz/