奧斯卡一直被外間批評太多白人，因此今屆納入咗好多女性同有色人種，連香港梁朝偉、甄子丹都有份。然而，史上唯一黑人奧斯卡影后荷爾芭莉（Halle Berry）依然非常不滿，更大鬧道：「做咗奧斯卡影后，到頭來根本毫無意義。」佢2002年以《孽愛傷痕》（Monster's Ball）贏得奧斯卡最佳女主角獎，成為史上第一位黑人奧斯卡影后，但過咗15年，佢依然係唯一一位。

頒贈奧斯卡獎嘅美國影藝學院（Academy of Motion Picture Arts & Sciences）日前表示，新評委來自57個國家，其中女性佔39%，仲有30%有色人種，希望提升組織多元性。正當全世界都關注新名單嘅時候，影后荷爾芭莉卻似乎唔滿意。佢曾經以為做咗影后，對有色人種會別具意義，但到頭來只有失望：「其實真係毫無意義，咩都唔係。我因此深受傷害，而且好難過」雖然有色人種不獲奧斯卡支持，但佢好積極地打算做導演同監製，為有色演員創造更多機會。