民主黨與中央溝通，達成政改方案共識，叫做一人行一步，大家妥協，於是擾攘經年之政改方案，得以在立法會通過，為香港爭取雙普選踏出第一步。呢一步雖然未盡如人意，但現代議會政治好少有一個全人類都高興嘅法案嘅，西方民主國家嘅議會有不同黨派議員，一日到黑都講求giveandtake，追求妥協，唔會僵硬不變。但香港好奇怪，有人搞政治一直堅持寸土不讓，唔用我嗰套，就要反枱抗議，中間無妥協餘地。民主黨首次打破迷思，初學妥協之道，追上英美政治作風，就立刻被激進派人士日鬧夜鬧，一啲傳媒渲染到民主黨支持度大減，係唔係呀？左丁山或者住得背啲，但自六月二十三日立法會通過政改方案到家，所識之人個個話民主黨好嘢噃，唔通我哋呢班人統統係活在象牙塔，不吃人間煙火嘅？
只能如此解釋，支持五區補選，投票畀五位連任議員之五十萬人，近來最活躍，最大聲，最得傳媒寵愛，故此甚有聲勢，五十萬人，係公民黨社民連之鐵票，佔選民人數14.7%，左丁山相信今年五．一六唔出嚟投票畀公民黨社民連嘅民主派選民，以後未必會投票畀佢哋，換句話講，「公社」嘅所得票數上限，好可能就係五十萬。傳統上，投票有所謂黃金六四比率，泛民佔選票六成，下一次立法會選舉，如果有五成投票率，便有約近一百七十萬人投票，泛民佔六成即一百○二萬票，減去「公社」之五十萬票，其他民主黨嘅約得五十萬票，啱啱打成平手，死數就係咁樣計，泛民一分為二。「公社」聯盟佔唔到優勢，佢哋不停咁攻擊民主黨，更可能催谷一啲以前不投票嘅溫和派選民走出嚟投票㖭。