今朝天氣仍然十分寒冷，唔知係咪咁，連馬都想跑多啲，暖下個身。繼昨日摩廐「花月佳期」墮馬走甩後，今朝再發生墮馬意外，薛廐「富利多」由助手在內圈操練，但馬兒突然大發脾氣，拋下助手走甩，助手其後經由其他在場人士攙扶，離開跑道，最後證實人馬均並無大礙。現時已過了馬季一半，薛達志季內只取得四場頭馬，認真黑仔，再加埋今朝的意外，可謂屋漏兼逢連夜雨。「富利多」馬主是黃敏華，其父乃著名地產商老闆黃志祥，此馬在澳洲時已屬後者名下。「富利多」血統偏向中長途，在港首兩仗跑嫌短的1000米直路賽敗難作準，今仗增程跑1400米，或見真章，且看能否為薛達志贏馬打破悶局。