(新增回應)

大台嘅尺度真係愈來愈大膽，J2台嘅清談節目《後生仔傾吓偈》為咗取悅年輕觀眾，兩位冠軍級港姐麥明詩同馮盈盈，經常喺節目中談性論愛，有時話題過激，連主持人陸浩明同其他男主持都嚇到口啞啞。

日前播出嘅一集，原本只係講做男仔有幾好。咁麥明詩話唔使忍受M痛，馮盈盈就爆seed話﹕「唔使大肚，唔使有橙皮紋，唔使陰道鬆馳。」跟住盈盈再問咗一個男人最痛嘅問題﹕「我想問你哋畀人打到嗰粒蛋蛋係咪好痛架？」

KOL林正峰(楓)即時搶答，仲興奮到企起身講咗句疑似爆粗話﹕「好X勁肥，嗰陣時，佢咁大隻嘅，一嚟喺禮堂，(我哋)有少少拗撬，佢一嘢咁抽落嚟，嘩，我覺得呢個(下體)凹咗，直頭係冇feel，之後去唔到廁所。」兩個女仔聽完笑唔停口，麥明詩仲好似好有經驗咁話：「有時做啲親密行為都會整親㗎嘛。」陸浩明就話：「試過踢波中蛋蛋，唔係局部地方痛，係震到腹腔都痛，成個人完全郁唔到，好似觸電咁。」

林正峰今日接受傳媒訪問時否認話﹕「我同同事聽咗好多次都聽唔到有講粗口，我們都聽到嗰句係"個個人好肥"。因為我好清楚知道做節目嘅守則係點樣，所以無論節目個話題幾爆都好，都一定唔會講粗口。同埋我本身都係一個註冊社工，自己對自己都有要求，知道要好好樹立榜樣，平時都好留意自己嘅言行舉止，無論鏡頭前後都唔會講粗口，亦係我對自己既要求。」

精選娛聞，喺晒《娛果》 http://fb.com/appledailyent