霍啟剛同老婆郭晶晶晚上8點幾拍拖到銅鑼灣嘅意大利餐廳撐枱腳，然而餐廳內只得佢哋一枱客，唔知係霍公子包場同老婆食浪漫晚餐，定係o依家生意難做呢！當時佢哋睇餐牌揀白酒，但霍公子發現門外有記者時，竟然拉住老婆即撇。

記者問霍公子點解咁快走？佢反問：「8點幾，唔早啦，點解知我喺度嘅？」記者話只係咁啱見到，霍公子笑笑口問：「係咪咁啱呀！」而着粉紅色衫嘅晶晶就全程甜笑挨實老公，之後兩人行到中華遊樂會攞車，由晶晶做柴可夫接載老公返歸。