蔡楓華、陳秀雯、袁麗嫦（Lisa）將於下月1、2號喺灣仔伊館舉行《真·經典演唱㑹》，全部歌曲圍繞經典電視劇集主題曲。三人今日到觀塘綵排，袁麗嫦獻唱《鱷魚淚》，蔡楓華則唱出羅文《魔劍俠情》。

受訪時蔡楓華風度地攞咪讓大家對談，介紹完自己唱咩歌之後，蔡楓華話會同Ella合唱《人在旅途灑淚時》，身邊嘅Lisa立即笑住糾正話：「我叫Lisa，你太多女朋友喇！」

陳秀雯會唱首本名曲《再見艷陽天》主題曲《艷陽》、《再見亦是老婆》及《穆桂英》主題曲等，雖然一段時間冇公開演出，陳秀雯話完全冇壓力，仲話：「壓力好多年前已經唔知去咗邊，我個心跳得慢，冇砰砰嘭嘭。」

反而蔡楓華就話：「我個心跳得好快，好似羅文話齋，就算唱咗幾多年歌都一樣會緊張，有人上台前會飲少少酒減壓，我就natural high，我不怕掌聲，不怕噓聲，最怕鴉雀無聲。」蔡楓華仲話今次唔會唱《倩影》同《絕對空虛》。

大家都異口同聲表示今次經典電視劇集歌曲係劇迷都會認識有共鳴，集合兩電視台精華。蔡楓華和陳秀雯曾於多年前合唱《碧血劍》，笑稱歌唔夠經典，入唔到今次演唱會。

精選娛聞，喺晒《娛果》
http://fb.com/appledailyent