古巨基今日喺北京出席《我們》世界巡迴演唱會，暨全新華語專輯《我們》記者會，基仔一身全紅老西現身，宣佈世界巡迴演唱會喺今年10月10日以深圳做首站，由上海、廣州、北京、福州、武漢、香港，一路唱到去英國、美國、澳洲、馬來西亞、加拿大等國家，橫跨四大洲，認真巴閉！

經理人霍汶希（Mani）喺會上特別送咗個瓷娃娃畀基仔，祝福基仔同老婆Lorraine早生貴子，而一班基仔好友何炅、謝娜、劉翔、蘇有朋、李榮浩、陳偉霆、謝霆鋒及成龍等亦為佢送上祝福，希望基仔可以雙喜臨門，快啲生番個小基基，基仔在主持人起哄下，仲自爆今年11月一定會補辦婚宴。

大會安排咗兩個可愛嘅小花童，點知佢哋一上台就叫基仔做「基叔叔」，搞到基仔即更正佢哋應該叫「基哥哥」，兩個小花童仲送上寓意象徵專輯《我們》大賣的大麥同埋雞精，希望「基叔叔」有好體力備戰巡迴演唱會。