前英格蘭代表隊前鋒朗尼因為醉酒駕駛被捕，同埋疑似偷食搞到一鑊粥。之前已經講過佢老婆高蓮已經帶埋三個囝囝返娘家，講到話要離婚咁滯。最新有報道話朗尼同佢老婆唔係話無得救，不過高蓮就畀咗個超級難題朗尼，就係「煲可以箍，不過要暫停踢波」咁話喎！

英國《鏡報》報道，高蓮要求咗朗尼同愛華頓喺季中請假嚟挽救呢段婚姻，球隊啱啱先至喺聯賽主場0:3輸畀熱刺，個timing真係可以話差到無人有，斷估朗尼都唔會呢個時候走去請假，唔係真係等做炮灰咯。報道引述消息人士話，高蓮已經清楚表達自己嘅要求，但踢波搵食嘅朗尼會唔會咁聽話呢，就真係未知數；亦有報道指，由於英超下個月又有另一個國際賽檔期，已經退出國際賽嘅朗尼可能會等到時先嚟補鑊喎！