做開舞台劇嘅詹瑞文，舊年同女友嘅鄭潔堯（Amanda）喺西貢開咗間cafe「西偲名屋」，喺冇做戲嘅日子，佢幾乎成日喺度打躉。

喺早前某個星期一，見到詹瑞文坐喺cafe門口，同一位疑似裝修師傅密斟，初時詹瑞文攞住電話皺晒眉頭，同師傅講解，之後兩人直頭行起身，對住店舖門前指手劃腳，聽到佢哋講，想將門口盞燈點樣整，睇嚟係想幫店舖門口加以裝修。

其間詹瑞文行去另一個方向，指住前面兩間舖嘅招牌同師傅講︰「人哋都咁整，唔犯法。」疑似想整個大啲嘅招牌。至於女友Amanda似足老闆娘喺店內打點，一時同同事傾下，一時自己動手推開趟門。之後見詹瑞文同師傅傾到七七八八，佢又同Amanda交代一番，只見Amanda不時點頭示意。

當年以《男人之虎》打響名堂嘅詹瑞文，12年因為搭上有夫之婦Amanda（新聞連結： https://bit.ly/2Hj4z1V ），拋棄糟糠甄詠蓓同女兒嘅詹瑞文，形象急插水，連徒弟蝦頭（楊詩敏）同泰臣（翟凱泰）都要搞到師徒反目，詹瑞文為咗個女人搞到眾叛親離。即使前年詹瑞文以佢成名棟篤笑《男人之虎》搞十周年紀念騷《新男人之虎》，都扭轉唔到個劣勢，o依家佢小本經營間cafe，講唔定係為自己搵出路。

精選娛聞，喺晒《娛果》
http://fb.com/appledailyent