瑞銀上星期搞出個大頭佛,內部投資銀行一個後生仔交易員阿多博里(圖右)被揭發涉嫌違規交易3年,前日公佈招致損失高達23億美元(約179億港元)!較之前估計嘅20億美元嚴重,雖然涉案交易員已被英國當局拘捕,但瑞銀亦不敢怠慢,隨即成立特別調查委員會徹查事件,今次仲要出動到舊年至委任嘅獨立董事、金管局前總裁任志剛。
對於以往做開監管機構嘅任志剛嚟講,今次要化身偵探,搵出案件蛛絲馬迹,相信都唔會難到佢。而同任志剛一齊拍檔調查嘅,都非泛泛之輩,出任調查委員會主席嘅係瑞銀高級獨立董事DavidSidwell,佢係大摩前高層,另一董事AnnGodbehere係瑞士再保險前財務總監。