【黃子華餅印】「無綫指定奸仔」太認真出事 俾李添勝迫到離巢?
李添勝奸角何浩源哲別
繼續係何浩源的故事。若要問何浩源是誰,請看另文。有詳盡介紹。(文章連結: http://bit.ly/2mbVO3N )
曾拍過張智霖版本《射鵰英雄傳》、飾演正氣哲別的何浩源,90年入無綫,96年大離開。何浩源最感激當日添叔李添勝慧眼識英雄,但當年決定走,亦因為添叔。
何浩源接受《蘋果》專訪,回憶當初年少輕狂,不禁莞爾。講番事件經過,由哲別開始講。
90年,修讀四年演技,何浩源終於演藝學院畢業喇。當時無綫四出搵新血,來到演藝學院,睇中何浩源。「嗰陣覺得自己好勁0架嘛,喺演藝學院浸咗四年喎,真係浸演技喎,個個演員都覺得自己係最勁0架啦。」苦笑了一下。
「好多謝添哥,嗰時搵我做《射鵰英雄傳》,做呢個『哲別』,教郭靖射箭嗰個蒙古師傅。試造型嗰陣,我哋追求演技嘅嘢呢,對造型好嚴謹,我就同添哥不斷咁樣研究造型,例如話前期嘅時候張智霖未出,咁佢嗰時係小朋友,咁我印鬚根就得啦;跟住到後期三四十集,講我同ChiLam打仗,嘩,我印鬚根就同ChiLam差唔多大喇喎!唔係幾好睇喎,不如試下做虬髯客黐到成面都係鬚啦!」
就係呢份執著認真,添叔深深喜歡這個小夥子,夠火,於是將之列為御用班底。「添哥喜歡我夠認真,於是年年都搵我,次次都成面鬍鬚,年年都今年就book定我出年(檔期)喇,即係:『喂!何浩源!出年預你0架喇!』『喂,《神鵰》呀!又係黐鬚呀!』如是者就黐下黐下黐咗幾個劇。
「我其實就,好鍾意做舞台劇嘅,於是乎呢……佢好大0架嘛,添哥喎!係咪先?我冇得度期做舞台劇。咁……就係咁樣啦,於是乎我就一時衝動,就走上藝員部,話,喂,出年夏天拍嘅《雪山飛狐》(夏天拍《雪山飛狐》?)就唔好預我喇。對方就話:『啊,唔拍呀,咁…你…唔得0架喎!』咁我話:『咁呀,咁算囉!』就係咁。就係咁樣囉。後生嗰時就係有好多呢啲…一個火就……做咗一啲決定。但係又未必係壞事嘅。」
離開無綫,有說何浩源鬱鬱不得志。他爽快地說:「真嘅,真係鬱鬱不得志嘅!」他逐字吐出。「其實好得意嘅,嗰陣時我離開TVB,個勢係好好嘅,」自信滿滿的雙手抱胸:「其實呢,TVB嗰陣係俾好多機會我嘅,亦都好多謝王心慰監製,佢俾好多機會我,我做好多奸角都好出位,跟住我就諗,唔通成世喺TVB做奸角?我要突破呀!嗰啲咁嘅嘢囉,又唔係話一時衝動因為唔想黐鬚而走嘅,但嗰刻係真係覺得鬱鬱不得志囉。」一口氣講完,何浩源頓了頓:「原來鬱鬱不得志呢幾個字係急口令嚟0架!鬱鬱不得志,OK?」
呢個道理,金牌丫鬟李彩寧要等到喺無綫拎埋「老人牌」(十年服務獎)先至明,何浩源比她早四年。(文章連結: http://bit.ly/2kQMJxc )
人人際遇不同,共勉!
記者:植詠珊(Cathy)
攝影:Neo、馮峰
編、導:Roy
場地提供:沙田廣東人小廚