「美棋BB」黃美棋一向樣子甜美，深得宅男愛戴，今朝佢忽然宣佈一件喜訊，就係佢榮升為「媽咪」，而佢嘅囝囝係有剛果血統!

黃美棋於尖沙咀出席「夢飛行2015」記招，嚟緊後日就會同56位殘疾兒童，加埋佢哋一位家長一齊飛到台灣展開三日兩夜之旅，美棋BB表示能夠見證56位小朋友首次坐飛機旅行夢想成真，佢覺得係一次好難得經驗，所以出發前心情都好緊張，今次仲會有廖碧兒一齊同行。

美棋BB稱自己未曾試過帶團出發，笑指自己可以做今次行程嘅「吉祥物」，令大家開心，今次夢想成真嘅56位小朋友分別有肢體殘缺或腦部受損，問美棋BB事前有冇咩準備，譬如學習照顧佢哋？佢話：「冇特別準備，對待佢哋同普通小朋友就得，千祈唔好帶有同情感覺，今次行程中對我嚟講都係大挑戰，同埋好多地方我之前都未去過，所以都好期待同一班小朋友去參觀。」

本身極之愛錫小朋友嘅美棋BB，更透露上月榮升為媽咪，佢助養咗一位住喺剛果嘅8歲男童，佢講：「好開心，啱啱收到佢嘅名信片，嚟緊仲可以同佢書信聯絡，又可以寄啲小禮物如書簽、貼紙畀佢，其實都係每年畀二千幾蚊，我會一直助養至佢完成學業為止。」