大摩同馬主洪祖杭早前因為「火箭駒」騎師配搭問題鬧翻，引發三隻同系馬一齊拉倉，大摩同馬主各有說法，真係公說公有理、婆說婆有理！

事件主角之一嘅「火箭駒」今日（10日）轉投羅富全馬房初出，強配爭緊冠軍騎師嘅潘頓，明刀明槍就係想贏馬省招牌，如果順利贏出，賽後應該周街都係花生殼。

「火箭駒」上季三歲時已經證明過有質素同能力，更被睇好係今季打吡爭標分子，估唔到今季大摩成績大跌watt，「火箭駒」同其他部份摩廐馬一樣，狀態同表現都不似預期，今季仲未交出頭馬；「佳騰駒」則喺打吡無功而回。

據知兩隻馬加埋身價好貴，幕後有好大期望，其後配邊個騎師嘅分歧，只係分手導火線。

大摩今季成績差，心水清嘅人都知冇可能入晒貝湯美數，未知大摩今季好多馬狀態未如預期，是否同馬房團隊換班太快有關，好幾個唔同崗位嘅馬房手足，因不同原因離開咗馬房。

而咁啱呢幾位馬房員工，全部去晒曾經做過大摩副練嘅羅富全嗰邊。羅富全開倉有大摩嘅舊伙計幫手，今季成績即刻遠遠拋離大摩，真係非常巧合。

羅富全贏多三場，就會打破蔡神仙58Win嘅紀錄，成為歷來首季開倉最多頭馬嘅本港練馬師，破紀錄應該冇乜難度。

佢自己親口講過，今季咁成功好大程度係歸功成個馬房團結同合拍，呢句亦唔係門面說話，即使練馬師有料，冇馬房班手足配合，只會事倍功半。

馬主將「火箭駒」拉倉當然心急想贏，以羅富全今季嘅鮮明作風，有好馬加盟，咁快就報名出賽，聽聞馬房上下都希望轉倉即贏做齣好戲，搵潘頓幫手就係希望更加穩陣。

阿Joe