張敬軒今日獲倫敦音樂學院頒發榮譽音樂碩士，頒發儀式喺香港大學。着上畢業袍嘅軒仔同大學校長一齊合照，軒仔話今次係一個好大嘅榮耀：「希望有朝一日靠自己真材實料，考獲一啲學位或者課程。」佢話曾聯絡過倫敦嗰邊，睇吓會唔會可以修讀遙距課程。佢透露其實本來今年都有計劃去英國或者法國進修，可惜屋企嘅寵物病咗所以打消念頭，而軒仔嘅父母就因為要留喺廣州照顧患病嘅寵物，所以今日冇現身。

提到近日因為教育局副局長蔡若蓮喪子，繼而喺香港幾間大學嘅民主牆都出現唔同反應嘅大字報（新聞連結： http://bit.ly/2eVtIYB ），既然嚟到港大，唔知軒仔有冇去民主牆度睇吓？佢話：「冇去呀，我有睇呢幾日嘅新聞，但唔發表評論啦，始終每個人對事有唔同諗法，交畀適合嘅人去處理。」

對於啲學生可能因此受罰，軒仔話：「我哋作為公眾人物榮耀係來自社會，所以我哋真係好希望社會可以安定，無論係咩陣營咩政治立場，呢幾年香港面對咁樣嘅經濟同社會狀況，希望可以搵到個方法減低大家嘅怨氣。」軒仔話近來每日打開facebook，最常見嘅新聞就係有人自殺：「希望學生家長或者所有人都諗下辦法，點樣去進行啲親子活動。」

對於今次事件源自網民和學生被指言論涼薄，軒仔直言：「因為社會氣氛唔好，係需要啲時間去緩和，加上早前有天災，希望年底有啲大節日嘅時候氣氛會好番啲。」對於網民，佢又話：「一路都覺得網民係一個好大嘅群體，有時會好考驗我哋嘅處理能力 ，但唔可能永遠活喺人哋嘅言論下，守好自己嘅價值觀，做好自己本分就夠。」