今晚《萬千星輝頒獎典禮》一開始，就係頒「萬千光輝演藝人大獎」，得主係剛剛開完紅館個唱、今年入行60年嘅68歲薛家燕，由胡楓同黎小田頒獎。家燕姐拍粵語長片做童星入行，96年加盟無綫拍處境劇《真情》而人氣再勁升。

家燕姐今晚着住火紅色低胸晚裝出場攞獎，露出好深嘅事業線，佢攞獎時話好興奮同要感恩，佢演藝生涯今年60年，呢60年唔簡單:「人生轉捩點係喺我人生最失意時，珍姐(曾勵珍)搵我拍《真情》，捱更抵夜，但自己冇同公司講辛苦，因為公司畀機會我，冇呢個機會就好難有安穩嘅家，所以我好珍惜。」講講吓家燕姐忍唔住喊出嚟。佢又話要多謝同事體諒，有時開工因為趕幾組搞到遲到，同事話唔緊要，自己有時唔記得食嘢，同事又會買嘢畀佢食，所以佢會繼續努力報答大家。

精選娛聞，喺晒《娛果》 http://fb.com/appledailyent