今個馬季競爭特別激烈，向來成績穩定如方、摩、東三大馬房都跌出前四名，幾個榜尾下游倉更加係粒粒皆辛苦，你睇新開倉的麥菲文子彈充足亦只贏得九場就知！

另一個榜尾下游倉李易達，由於以往曾收過兩次警告信，故每季一定要達標至過到關，現時10場頭馬在手仍未去到安全位，肯定不會放軟手腳。

後晚（14日）谷草李易達雖只出三駒，但當中打王牌的第三場「海之濤」、「越駿寶」都能力十足。

九歲老馬「海之濤」歷來在谷草1000米贏過10次，好多精英班級數馬亦有不如。季內56分贏過馬後轉眼又落到58分，減得認真快，由於配黃皓楠只需負126磅，同贏馬嗰場負123磅極接近，故絕對有得爭。

若計着數點都唔及第四場「越駿寶」，季內八戰評分㩒低至現時40分低位，上季分別於 40及49分贏馬，證明目前評分何等有利，隨時可以到位。