賈思樂（Louie）噚晚喺尖沙嘴舉行「Me & My Girls in concert 2017」音樂會，慶祝入行40周年，吸引汪明荃、阮兆祥、陳法蓉同向海嵐等捧場睇騷，劉德華就送上花牌祝賀。今次音樂會就請咗王馨平、黎瑞恩同羅敏莊等人做嘉賓。

三嫂戚美珍就俾Louie獲邀上台爆往事，三嫂話：「我好多嘢爆，識咗太耐，好了解佢，我細個就睇佢，好有緣藝訓班後入EYT，做咗同事。半年前佢已經話我知有騷，當時佢已經入咗表演狀態，隔一陣佢又會同我講，我嘅big day記唔記得呀 my dear。」三嫂仲講笑話可能Louie怕佢靚過晒其他女嘉賓，所以冇搵佢上台唱歌。

講到有冇機會開演唱會？三嫂就話原來準備5月會開，但係因病要臨時取消，佢話：「舊年有導演叫我開(演唱會)，但係我患咗椎間盤突出，唔舒服，醫咗好耐，企1、2分鐘一定要坐，用咗拐杖好耐，o依家情況好咗，仲有做物理治療。佢知我去咗區瑞強演唱會，噚日又問我10月做唔做？我話睇多兩個月先。」講到同時受傷嘅華仔，三嫂話：「真係不敢想象，我椎間盤突出拮到神經線都麻痺，唔會行唔到，佢話畀隻馬壓親，真係好痛，係呀劉生韌力過人，出返嚟企喺度，希望佢快啲好返，等睇佢演唱會。」三嫂仲講笑話想做華仔演唱會嘉賓。