做咗18年理大校長嘅潘宗光，上月31日終於退休，新校長唐偉章噚日上場，唐校長最大特點係似百變藝人鄭少秋，原來佢上次嚟香港時，已經有唔少人指佢似秋官。八方近距離見校長，望落有幾分相似，至於校長是否好似「扮嘢秋」咁識扮鬼扮馬，不得而知，不過相信假秋官腳頭好過真秋官，事關09首日股市開紅盤，冇出現秋官效應。
新上場就遇上金融海嘯，未來籌款相信好困難，唐偉章好樂觀，指大學辦得好，自然有人捐錢，不過佢承認理大部份項目受影響需要延遲。唐校長喺香港成長，後來留美喺學術界任教、研究30幾年，呢次係第一份返香港嘅工作。

作風親民有問必答

離港多年，唐校長話覺得香港人真係好幸福，因為香港係美食天堂，北京菜、上海菜都味道一流。新官上任，唐校長作風非常親民，噚日見記者幾乎有問必答，透露太太係大學同學，原本做會計，𠵱家隨佢返港工作。校長嗜好幾多，平日愛行山、踩單車。