澳洲農業及水資源署突然針對香港同從化間運馬檢疫安排，要做生物安全管制檢討，由下月2日起禁止香港馬入口，個檢討未知要搞幾耐，令馬會非常頭痕。

限制令下，香港馬唔畀去當地出賽事小，但退役馬亦唔可以直接運去澳洲。管制亦同時打消晒澳洲馬訪港部署，唔使旨意澳洲馬后「雲絲仙子」年尾會嚟跑國際賽。

澳洲嗰邊咁驚青，擺明對大陸從化嘅檢疫程序有保留，落閘就係慌死感染到馬匹疫症。其實馬會喺18個月前，已經開始中港兩地馬匹試運，成個過程監察好嚴，當時亦有通知澳洲首席主任獸醫，對方都冇話有乜憂慮，家陣無啦啦抽起條筋落閘唔俾香港馬入口澳洲，又難怪馬會谷氣。

其實馬會近年喺獸醫、化驗同馬匹檢疫等各方面，都係世界頂尖水平，從化基地係眼前最重視嘅項目，馬會都唔想從化有乜差池，更加唔會掉以輕心。澳洲之前一直唔聲唔聲，又單方面提出制裁行動，實則完全冇實質理據。

馬會家陣當然想大家傾掂數，取消禁運限制，若然談判解決唔到問題，馬會唔係冇本錢同澳洲鬥強硬。

話晒咁多澳洲騎練喺香港馬圈搵食，馬會一樣可以玩反制裁，反正大部份澳洲騎師，俾馬迷嘅印象都係古靈精怪，稍後大可逐步收緊啲澳洲騎師客串牌照，順手清晒啲瘀血，再向其他地區嘅騎師招手，唔憂搵唔到人。

馬會仲可以游說本地馬主，暫停喺澳洲引入新馬，呢招對澳洲當地馬圈嘅經濟收入，影響更加直接，睇怕到時嗰邊嘅反彈更大。馬會作為全球頂級嘅賽馬機構，應該有啲風度，但亦唔使步步退讓，到時咪睇吓邊個手瓜硬。

阿Joe