Netflix犯罪神劇《破案神探》（Mindhunter）大受歡迎，更被視為本年度掃獎嘅頂頭大熱。呢齣由大導大衞芬查（David Fincher）親自監製執導嘅劇集噚日就公佈會開第二季，令一眾劇迷非常興奮，而男主角尊拿芬哥夫（Jonathan Groff）接受訪問時，大談大衞芬查對拍攝嘅執着，更大膽話大導燒錢拍劇！

最近尊拿芬哥夫接受雜誌《GQ》訪問，就大談拍攝《破案神探》嘅感受，當然大家最關注嘅都係同大衞芬查嘅合作啦。尊拿芬：「佢出名拍好多個take，佢嘅哲學就係燒好多錢，做好多事前準備先去拍。」佢又暗指大導喺片場好惡：「當我樂觀咁笑，佢就會話：『唔好笑！』，到我真係睇返套劇，我就覺得：哇！大衞令我識做戲！佢想引發我嘅能力，令我感受從未體驗到嘅感覺，而且佢會逼每個人跳出安舒區。」至於有關方面就公佈劇集會再開第二季，仲於Twitter寫上風趣嘅一句：「我哋要同更多對象對話。」點出劇集主題，就係兩個FBI透過同罪犯對話而發掘出慣性殺人犯嘅犯罪心理。

更多娛聞，喺晒《娛果》
http://fb.com/appledailyent