【小心跌呀！】230磅細細粒挑戰空中瑜伽 肥腩半天吊
蘋果日報 2019/12/05 17:10
細細粒空中瑜伽
香港人為健康着想，最簡單會選擇跑步，不過街跑充滿意外，隨時跑到半路會被大光燈照及遭人無理取鬧，更多人選擇轉入室內運動，輕輕鬆鬆做瑜伽。近年空中瑜伽都好受歡迎，「最靚楊貴妃」李嘉欣、鍾欣潼（阿嬌）、倪晨曦都玩過，港姐陳曉華繼去年參選時表演空中瑜伽失手，早前於台慶又表演，就知呢項運動好吃香。
陳嘉佳（細細粒）近日加入空中瑜伽行列，去年她曾公開體重高達230磅，今日見她玩空中瑜伽令人膽戰心驚，她換上一身運動裝升上絲帶，身旁兩位教練即戒備十足，紮馬輔助細細粒嘗試完成動作。細細粒在絲帶上動作僵硬，大叫「我起唔到身呀！」、「我唔夠力呀！」，身後助手就爆笑，幾經嘗試仍未能順利完成整套動作。
細細粒這次向「高難度」挑戰，是響應健康教育計劃拍短片，不過她的軟柔度認真麻麻，雖然她說做試過高溫瑜伽，不過今次見她做普通瑜伽動作都身體僵硬兼臉容扭曲。今次她挑選空中瑜伽失敗，不過就成為全場開心果，營養師建議細細粒一個星期要做至少三次運動，又因為細細粒體重高，所以瑜伽就適合她。講到之前沒有堅持高溫瑜伽，細細粒自爆：「因為之前上堂我覺得好舒服，有幾次都做做吓瞓着咗，感覺好似好浪費咁，所以冇再去喇。」
細細粒挑戰空中瑜伽。
睇見都辛苦。
細細粒邊做邊大叫，場面爆笑。
試到人仰馬翻，但仍未能完成整套動作。