被指要幫《蘭花刼》補鑊嘅《踩過界》噚晚首播，李佳芯、王浩信、蔡思貝、陳庭欣(Toby)及張振朗等一眾演員，噚晚喺將軍澳一間酒店一齊睇首播，仲有粉絲喺現場為偶像打氣。

陳庭欣今次突破自己，喺劇中飾演跨性別人仕，男兒身但喜歡扮女仔，其中一場浴室全裸戲已成為焦點。Toby話要多謝監製肯俾機會自己挑戰，佢話﹕「我有做資料搜集，仲參考咗《丹麥女孩》，我喺戲中有女友㗎。（有冇親熱戲？）搭吓膊頭啫，其實同性咀嘴仲舒服啲。反而我個身型唔夠橫，着西裝要塞好多毛巾。」Toby話監製幫佢搵咗一位身型瘦得嚟又有腹肌嘅男替身，但拍攝後巷嗰場戲時都要好大犧牲，佢話﹕「為咗方便日後key替身，拍嘅時候都要着阿婆底褲同tube top，真係好尷尬。」

而李佳芯都有投訴，話經常要着貼身戲服，又要表演性感舞步，仲要同張振朗及王浩信有床戲。咁現實中係咪咁開放？李佳芯話﹕「屋企得我一個女，媽咪比較緊張，所以好多嘢我都先斬後奏，識到男朋友都要俾啲時間佢做心理準備。」