少女標本成員Jessica（簡淑兒），舊年喺大台處境劇《愛．回家之八時入席》亮相，當時憑住月亮笑眼加娃娃臉，俾網民大讚有仙氣。

到o依家播緊嘅《迷》入面，憑住27歲之齡，竟然可以飾演田蕊妮讀緊中學嘅囡囡，童顏果然係得天獨厚。

不過又回帶睇番佢2012年參選港姐個樣，當時眼細鼻扁顴骨大嘅佢，第一輪就被foul出局，五官同o依家個萌樣幾大分別。俾人質疑後天加工嘅簡淑兒，有次出活動，仲即場揑鼻，以正視聽。

而美國回流返港嘅簡淑兒，入行以嚟好少講自己家庭背景，但今日有報道指原來佢係一名富家女，家族經營珠寶首飾生意，喺將軍澳同上水都有分店，喺紅磡嘅一幢工業大廈亦購入兩個單位作寫字樓，生意規模唔算細，報道指簡淑兒現時同胞姐同住於九龍站豪宅凱旋門。