5年前今日嘅特首戰認真精采，話說梁振英因為不斷被《星島日報》狙擊而心生不忿，趁落區向《星島》發炮，與此同時，星島新聞集團主席、人稱「炒何」嘅何柱國開記招駁斥梁振英，仲反問記者驚唔驚CY當選。（嘩，呢條問題，都唔使答案嘞啩？！）

「會唔會一鋪清袋」

話說CY早知炒何會開記招，於是搶閘回應話一直尊重新聞自由，相信「公道自在人心」，但又不滿一啲冇事實根據嘅報道已經「唔係一兩日嘅事，係呢兩個月嘅事」。CY邊話自己唔係針對記者，邊話《星島》嗰位女記者一路跟住佢問問題，「似乎唔係講畀我聽，而係講畀身邊嘅嘉賓聽」。
炒何就喺記招話自己要保護夥計，反問CY身為特首參選人，「大家關心你管治能力，有乜嘢唔講得畀人知？」然後再寸爆CY生意失敗，「如果你間公司作為主業，價值都做到得番零，將來由你管治香港，會唔會令我哋一鋪清袋？」當記者問炒何驚唔驚梁當選？佢即刻話：「你驚唔驚？驚唔驚佢封殺你新聞？」呢句反問今日聽起上嚟，真係令人百般滋味在心頭。