中聯辦九龍工作部部長林武，俾人踢爆對銳意出選九龍西嘅梁美芬「鼠王芬」照顧有加，唔單止幫佢召集地區樁腳，仲不避嫌開聲叫人多多支持鼠王芬，噚日呢對「政治緋聞」男女，雙雙出席黃大仙工商業聯會就職禮，兩人似乎不欲呢段「政治地下情」曝光，極力迴避合照。

中聯辦肆無忌憚干預選舉令人側目，八方噚日問林武係咪撐硬鼠王芬，佢最初笑笑口話唔答，後嚟避無可避，就話「呢方面你哋先係專家」，總之唔肯公開表態，可能怕太明目張膽，又遭自由黨扭計投訴。小道消息流傳，林武被踢爆幫鼠王芬競選後，俾上級領導「照肺」不下一次，難怪佢𠵱家聽到鼠王芬個名，仲驚過見到老鼠。
男方閃閃縮縮，女方則扮大方，鼠王芬話同林武見面都唔覺尷尬，因為好多朋友都支持佢參選，但話口未完，見到林武到場後，冇耐佢就速逃，其間有記者想拉兩人合照，鼠王芬推推搪搪堅拒合照。佢解釋因為要趕住同居民開會討論港鐵黃埔支線問題，所以要走人。寧俾人知，莫俾人見，搞地下情或「政治地下情」嘅男女，心態原來一樣。