韓國男神金秀賢以及男團FT Island成員李洪基，上周末參加咗喺韓國京畿道水原市舉行嘅「韓國職業保齡球第22期選拔賽」，挑戰成為職業選手。

經上周30回嘅賽事，兩人成功進入噚日同今日進行嘅復賽，呢兩日分別舉行15回。完成噚日嘅15回賽事後，金秀賢最終以183.1平均分，於94名選手中排喺第78位，而李洪基則以173平均分，排第91位。

兩人今日於京畿道龍仁市保齡球場進行第2日嘅復賽，到底金秀賢同李洪基有冇機會參加下月中為期4日3夜嘅集訓，就要睇埋今日嘅成績先知。而截至韓國時間12點，兩人完成咗8回嘅比賽，依家8回嘅平均分再加上噚日15回嘅平均分，目前金秀賢嘅平均分為186.1分，暫時於94名選手中排第77位，李洪基就有182.8平均分。

而韓國時間4點正式完成今日嘅15回比賽，加埋噚日15回賽事嘅平均分，金秀賢最終以192.3平均分，於94名選手中排第68名，李洪基則以177.2平均分排第89名，不過兩人未達參加集訓嘅標準(兩日30回比賽合共200平均分或以上)，最終遺憾止步。