陳慧琳（Kelly）同楊千嬅兩位潮媽今日喺尖沙嘴出席Kiehl's「Nature's Playground」揭幕禮，幫護苗基金籌得100萬善款。佢哋都不約而同着咗斜膊露肩裝，而Kelly嗰件仲係泳衣潮襯透視褲，弗爆身型信心爆棚，好sexy喎！Kelly話：「唔濕身唔sexy，o依家唔係最弗，演唱會先係，但係唔可以停留喺嗰個狀態，會黐線。」

講到只得9歲嘅香港小巨肺Celine（譚芷昀）衝出國際，參加美國才藝節目《全美一叮》（America's Got Talent）引起好大迴響（新聞連結： http://bit.ly/2sljbIx ），Kelly話有留意，佢仲搞笑話：「我都想搵佢爹哋學，好勁呀唱到，點教㗎？教吓我好過。」

但對於有負評指Celine冇晒童真，Kelly就咁睇：「冇辦法，只係一段時間啫，佢想達到個成就，佢會學到覺得乜嘢都係好小事，唔怕困難，去比賽係一個經驗，讀萬卷書不如行萬里路，唔一定要讀死書。」咁Kelly想唔想兩個囝囝都咁叻？佢話：「冇可能！我唔識，迫唔到佢咁叻，仔邊有咁乖！o依家都唔知佢哋嘅天份，努力同做人態度最緊要，天份慢慢培養。」