綽號「肥老闆」嘅張華峰由2012年起，做立法會金融服務界議員，一直努力為中小券商向政府爭取權益，但似乎冇乜大成效，可能因為咁，搞到張華峰心淡淡，噚日話如無意外，下屆唔會再競逐連任，希望業界可以有個肯承擔，又正氣嘅人出嚟參選，仲點名讚東泰集團主席李君豪，叫佢諗諗出嚟參選。

斥CDR與WVR將造成惡性競爭

張華峰同李君豪2012年一齊參選立法會金融服務界，當時兩人鬥到難分難解。張華峰話，當年佢哋激辯連場，但從來冇人身攻擊，事後兩人亦有傾有講，所以覺得李君豪份人都唔錯。
話晒仲有兩年先退任，家陣講參唔參選有啲言之過早，所以張華峰噚日都繼續為業界發聲，更「力排眾議」指中國存託憑證（CDR）會同本港同股不同權（WVR）造成惡性競爭。
佢話CDR門檻寬鬆，明顯衝着本港WVR而來，港交所行政總裁李小加早年成日話互聯互通可擴容，例如新股通、ETF通等，推銷同股不同權時又話可吸引五大獨角獸回港上市，但暫時無影，張華峰質疑「究竟佢講嘅時候，知唔知中證監做緊CDR，有冇查詢過企業來港嘅意願？抑或只係憑空想像？」
但佢對港交所新主席查史美倫寄望甚高，指查太曾任職中證監，與內地關係良好，亦了解金融市場運作，期望佢能「打開應通但未通嘅項目」。

李華華
mailto:[email protected]