懶理場上同PSG新隊友卡雲尼關係變差，趁今周中冇比賽，尼馬就飛咗去倫敦，同F1車手咸姆頓一齊去派對消遣，同場仲有Victoria's Secret嘅匈牙利模特兒Barbara Palvin。

呢個派對由英國《Love Magazine》舉辦，當然有好多名人出現，尼馬同咸姆頓都受邀出席，仲有Barbara Palvin等模特兒同一班名媛等等。尼馬著咗件紅色LV外套，帶上頂Cap帽，相當搶鏡。佢同著住件又黑又啡奇怪T恤嘅咸姆頓孖住行，真係鬥搶鏡。喺派對中，佢哋兩個仲搵埋Barbara一齊合照，影咗扮鬼臉嘅相放上網，睇落尼馬心情都幾靚。

周日法甲，巴黎聖日耳門2:0擊敗里昂一戰，尼馬同卡雲尼竟喺比賽中爭射12碼，種下心結，仲傳佢返到屋企即刻unfollow咗呢位烏拉圭前鋒嘅IG。至於咸姆頓周日就過得好開心，喺F1新加坡站封王，喺車手榜遙遙領先。