【韓流】喬妹真係有咗? 宋仲基離港拿住「Babies」
宋仲基太陽的後裔
韓國男神宋仲基今年10月31號喺首爾新羅酒店娶神劇《太陽的後裔》拍檔宋慧喬,兩人舉行世紀婚禮,吸引各地傳媒到場採訪。
由於兩人一直死口不認戀情,直到今年7月先公開認戀兼同時宣佈婚訊,震驚全城。當時已有不少人猜測兩人奉子成婚,所以才急於宣佈婚訊,但喬妹方面已否認懷孕。而雙宋喺婚前到巴黎旅行,當時有照片流出,喬妹疑似肚凸凸,又再惹來懷孕疑雲。
不過因為當事人冇公開任何消息,所以大家對於喬妹係唔係懷孕都係估估吓,無法求證。而身為雙宋粉絲自然希望兩人早日生B,期待雙宋嘅愛情結晶。
上周四宋仲基來港出席《MAMA音樂頒獎禮》,完成《MAMA》後宋仲基未有即刻離港,直到噚日宋仲基就離港返韓搵喬妹,事後網上有宋仲基拿住一本印有「Babies」嘅書流傳,令到粉絲一度好驚喜,以為男神報喜,不過原來呢啲只係美麗嘅誤會,從粉絲拍到嘅片段所見,原來該本並非書本,而係粉絲畀宋仲基嘅信,可能粉絲想祝宋仲基早日生B而咁啱就揀咗有「Babies」字嘅信封,但係張相都令到粉絲一度興奮。
另外,噚日亦有雙宋婚禮嘅新相流出,當中有出席婚宴嘅嘉賓就上載與雙宋嘅合照。
更多韓流,喺晒《娛果》
http://fb.com/appledailyent
初頭大家以為宋仲基買咗本嬰兒書,不過原來喺粉絲畀佢嘅信 (網上圖片)