憑選港姐入行嘅黃心穎，雖然只短短6年，但心穎就已經由港姐亞軍變成劇集「女一」，成績遠遠拋離同屆冠軍張名雅。

不過今日就有周刊報道指唱歌普通但又極想成為歌手嘅心穎，為達成心願「一味靠黐」，除咗狂去演唱會睇騷外，仲經常叫朋友帶入後台影合照扮friend，咁都唔止，心穎同曾經係歌手、同圈中人相熟嘅車婉婉，合作拍電視劇《牛下女高音》後成為朋友，其後仲黐埋佢個friend趙學而，非常上進。

最近心穎更被影到，男友馬國明陪佢一齊出席有婉婉、學而嘅飯局，可惜全程被女方冷落，只能淪為陪坐，悶足幾粒鐘。對於俾人話「一味靠痴」，心穎回覆傳媒時就只係話：「無睇內容」，又指該飯局係：「耐唔耐就會同啱傾嘅朋友食飯，係好簡單嘅普通朋友飯局。」而對於被指狂睇演唱會兼入後台扮friend影合照，心穎就話：「做演藝睇番演藝嘅嘢好正常，冇乜好回應。」

其實大家最熟悉心穎嘅歌，相信係《愛·回家之開心速遞》嘅主題曲《在心中》、同埋夥蔡思貝、邵珮詩、馮盈盈、張寶兒合唱嘅《到此一遊》，至於好唔好聽？真係見仁見智喇。

心穎不時都會一展自己嘅歌喉，舊年佢去學唱歌時，就唱咗已故歌手陳僖儀首《蜚蜚》，雖然自嘲「唱得真的不太好」，但仍然post上網俾大家欣賞，但要講到最經典嘅，就一定係佢喺大台節目中挑戰王菲首本名曲《約定》，雖然聽落的確係有待改進，不過就勇氣可加。

精選娛聞，喺晒《娛果》
http://fb.com/appledailyent