晨訊科技（2000）喺上年半年結打後，公佈每月營運狀況，整體上good fit，就快派發全年嘅成績單，冷灶值得煲煲博有盈喜。
晨訊主打手機ODM同解決方案，兼啱啱拓展物聯網瓣數，而集團出品三防智能手機，兼通過大孖沙AT&T極嚴苛嘅認證，講技術，晨訊一樣top fit。食住環球智能手機繼續大熱，晨訊上年上半年已經虧轉盈，賺近五百萬元（二○一三年上半年勁出血1.26億元）。

PB僅0.5倍

而喺半年打後，晨訊營業收入，除咗七月同八月錄到同比跌幅，其餘九月到十二月營業收入，係按年增加11.7%、97%、72%同61%。而總計晨訊去到十二月底二○一四年全年收入23.5億元，增幅37%，靚仔到痹。
再講，晨訊主打高端ODM手機瓣數，唔使好似其他OEM廠咁，毛利俾榨壓，加埋集團家陣實行自動化生產，亦都減卻咗勞工成本嘅問題。喺收入增加同毛利齊齊改善底下，晨訊就快派發二○一四年度成績單，已經有得博盈喜。
又根據權威IDC預測，智能手機經過對上兩年高速增長，今年全球智能手機出貨量，仍可以去到十四億部，增幅12.2%。又晨訊亦喺半年度業績單度講明，正係針對一間美國大型運營商手機版本去研發，預計今年上半年交付。手機瓣數好景，晨訊今年張成績單繼續有貨交。
晨訊再對上兩年出血分別係2.4億同0.97億元，業績差，股價自然冇運行，現價（0.375元）潛喺八年低位，比二○○五年上市價1.7元，已經跌咗七成過外，PB得0.5倍，但業績一回穩，股價大翻身。買晨訊，先博盈喜，當上番近一年橫行頂0.5元，要升三成，PB得0.6倍，未有耐升過籠。

錢雋
細價股專家
本欄逢周二、三、五刊出