現年46歲的息影女星陳加玲，今日忽然向傳媒高調發聲明暗寸舊愛，鬧爆對方係包住人皮嘅獅子老虎，更指俾呢件人生憾事滋擾咗20幾年，所以要作適當說明以正視聽。

佢個聲明話:「本人確實在約二十歲時認識了兩位香港男仕，因當時年幾（紀）太小非常無知，不懂得分辨好人壞人，在對方瘋狂式追求兩年後繼而拍拖，其中一位人兄一直表示自己是單身，當時我實在太無知，誤信對方的滿口謊言，其後當我知道事情真相的時候，已為時已晚，當時我唯（惟）有對對方的前妻道歉，說明一切，幸得到她的明白和體諒，在此我想再次感謝她的包容和諒解！」最後仲總結:「地球好危險，包着人皮的獅子老虎滿街行，請大家小心。」

追溯返陳加玲嘅情史，佢曾經同藝能副總裁葉偉忠、藝人黃子揚等傳緋聞，要數最轟動嘅就係早前被控洗黑錢罪名成立，被澳門法院判監嘅羅傑承嘅一段情。90年有家室嘅羅傑承因為投資拍戲而邂逅陳加玲，苦追兩年陳加玲先接受，更為此同妻子Evan離婚，不過兩人相戀6年最後都係分手收場，羅傑承02年與梁芷珊結婚，兩人育有一名女兒。

陳加玲與羅傑承之後有生意合作，但不斷傳出有錢銀糾紛，03年陳加玲曾向羅追討一千萬利益。最近因為羅傑承被判刑，佢同陳加玲的新聞又再被人注意。