早前傳過《爸》第五季停播，因為大陸報道湖南省紀委檢察廳官網發佈中共湖南省委對湖南廣電巡視「回饋以及整改的結果」(文章連結: http://bit.ly/2iPkiz6 )，指湖南衛視部份節目存有問題，親子節目《爸爸去哪兒》批評為吸引觀眾眼球，存在過度消費明星子女之嫌，不利青少年健康成長，有傳《爸》第五季唔俾播。不過噚日Youku更流出網上預告片(新聞連結： http://bit.ly/2eMsqij )，有網民指係改喺網上播。

今日個節目真係直播，不過就係網上直播，芒果TV同Youku都有得睇!播出首集，終於見到「小小春」，不過更多網民討論吳尊嘅一對仔女。

節目一開始，介紹幾位星爸去佢哋屋企睇一下，先係去陳小春位於大埔逸瓏灣豪宅，見工作人員敲門，「小小春」Jasper戴住巴斯光年面具出場，同工作人員講：「我是巴斯光年，Jasper不在家。」跟住工作人員問佢哋可唔可以入嚟，Jasper就話等一下，「你們不能看我」，Jasper閂門跑番去床，掟低個面具，媽咪應采兒都呆咗，Jasper再好乖咁打番開對門，同工作人員開玩笑。

小春喺節目中就話：「他還未生出來的時候，我都還不知道我有個兒子了，到底是怎麼回事，當生下來之後，就拿着，這是老天爺賜我一個很好的寶寶。」應采兒同囝囝Jasper講出去玩要小心，Jasper問為甚麼，應采兒答會跌倒，Jasper即踩車扮跌倒喺梳化，令小春同應采兒甚無奈。

小春又話自己唔會太遷就囝囝，算係嚴父，而應采兒就向工作人員溫馨提示：「我希望節目組不要太輕易地就是讓他們兩個人，太多獨處的時間。陳先生在家裡，沒有獨自帶兒子超過六小時。」此時，小春喺囝囝屋企，就拎起玩具槍射向囝囝，囝囝先呆咗，之後大笑出嚟。

應采兒叫老公要每朝幫囝囝量體溫同沖涼，小春自信十足，話唔擔心照顧唔到個仔，節目就cut咗少少照顧小朋友嘅片出嚟，小春同囝囝共餐，揸筷子夾餸，叫囝囝試食，囝囝以為爸爸夾俾佢食，點知小春自己夾咗落口食，阿仔跟住阿爸又係咁跌，又對阿仔大喝：「Hurry up!」

見阿爸咁嬲，囝囝Jasper反應比爸爸更成熟，勸爸爸"Can you stop angry now?"之後小春同囝囝講"Sorry!"

小春都直言囝囝出世4年間，自己都要工作，對囝囝了解10分滿分，只可以俾自己1分，講到有咩任務，就係爸爸要聽囝囝話，而囝囝即神秘唔俾媽咪聽，靜靜講俾爸爸聽，佢最想嘅任務係希望同爸爸永遠都係最好嘅朋友。