教育政策接二連三「獻新猷」，令家長疲於奔命。當局強推小三BCA（前稱TSA），卻避答家長能否罷考，聲稱交由「校本決定」。黃雯今年初正懷第三胎，為了抗衡BCA，腹大便便去參選小三兒子學校的校董，結果成功推動學校容許家長決定是否讓子女考BCA。她上月剛坐月完畢，即到立法會出席BCA公聽會，繼續控訴教局漠視民意。

記者：葉偉東

黃雯的兒子就讀葛量洪校友會黃埔學校（葛小）三年級，她今年三月當選葛小法團校董會家長校董。她參選時正懷胎準備生小孩，「嗰時係大住肚去選，大住肚喺街派傳單，大住肚開第一個（校董會）會議......開頭都唔算太辛苦，係去到四月初差唔多生時，開會就真係吃力啲，開頭亦都有諗過唔選，怕畀老公話：『做乜大住個肚都走去選』」，最終她為了孩子「硬住頭皮去選」，才能促成家校合作讓家長自由參與BCA。

她上任後立即就TSA廢存、復考爭議搜集家長意見，再把聲音帶進校董會議，「其實本身學校已經唔操練、唔谷TSA（BCA），但仍然有部分家長唔想考……有啲（家長）覺得政府霸王硬上弓，有啲覺得制度有問題，已經異化、扭曲」；最終，黃成功推動校方，發通告讓家長自由選擇，做到「畀家長、學生有得揀」。

按現行《教育條例》，所有資助學校均須成立法團校董會，制訂學校教育政策，校董會組成亦需有不少於1名的家長校董，讓家長直接參與校政；黃認為，家長校董的角色，在於如實反映家長間不同的聲音，「有啲家長支持（BCA），但亦有部分家長反對，咁反對嘅（學校）又點處理？」

不少家長均害怕提出意見等同對抗，最終會被標籤為「搞事份子」，黃說：「其實同學校溝通好緊要，要帶出一個訊息，其實家長從來唔想同學校對抗，最重要係透過討論，達成大家都啱方向嘅共識」。黃認為當中最大阻力不在校方，而在於家長普遍遺忘家教會、家長校董的角色。家長應深信自己確有能力推動校政，確保學校執行BCA等教育政策時「畀家長、學生有得揀」；參與校政佔用的私人時間並非外界想像中多，「一年都係開三、四次會，其實唔會話用好多時間」。

香港革新教育家長同盟周勁倫身兼聖公會聖彼得小學家長校董，「最重要係開放態度……家長唔使太擔心（表達不同意見），因為呢個係一個良好示範點去表達自己」。以BCA為例，與其用不同理由請假，倒不如與學校溝通，「學校自然要回應你」，亦可鼓動更多家長表達意見。周又稱校方不會干預家長，「因為學校標籤你只會令反效果更大，令形象更差，甚至變成家校對抗，無助事件。」周參選家長校董全因「自己孩子自己救」，「如果自己都唔關心仔女安排，係無人幫到你」，家長參政亦可免卻子女作為家長、學校之間的磨心。