（新增內容）奶媽逆民意強修送中惡法，點知引發上周日（9日）嘅103萬人上街遊行，仲因為之後繼續展示佢嘅「權力的傲慢」，再激發年輕人佔據金鐘主要道路抗議，仲同警察爆發激烈流血衝突。奶媽終於喺上周五（14日）出嚟開記招宣佈暫緩修例，但態度依然「寸寸貢」，拒絕為過錯落台。中共就不斷放風，拒「食死貓」之餘，仲將所有責任推晒畀奶媽，只可惜唔夠徹底，無上演一幕「揮淚斬馬謖」，結果引發噚日近200萬加1人上街，規模比上周日更龐大、氣氛更熾熱。唔知北大人，會唔會呻笨呢？！

睇番網上嘅言論，絕大部份網民都對奶媽喺記招上嘅表現完全唔收貨，從奶媽嘅嘴臉可見，佢係好唔甘心、好唔順氣咁樣宣佈暫緩修法，雖然承認強推修法有失誤，但拒絕辭職，就連公開向市民道歉都唔肯。好多人都話睇完奶媽嘅講話，仲更加嬲，真係火起嗰隻。唔怪得噚日嘅遊行人數，比上周日更加多，而且仲係好多一家大細咁樣走出嚟行。有口痕友就話，奶媽讀書嗰陣年年考第一，仲係香港大學一級榮譽畢業，原本一件喺奶媽口中嘅「好事」，竟然會變成民憤大爆發，連續兩周都有過百萬人上街遊行，佢真係攞咗香港史上嘅第一！

路透社噚日一篇報道就話，北京其實對於香港處理今次修例嘅做法相當不滿，仲嚴重質疑「好打得」嘅奶媽辦事能力，似係放風為「棄卒」做定準備。外傳奶媽宣佈暫緩修例前，曾與韓正副總理喺深圳見面，仲喺對方面前誓神劈願話會做滿餘下任期。若果韓副總理當日狠心一點，勸奶媽學當年董伯伯腳痛落台，或者稍為表現得有誠意撤回修例，真誠向市民道歉或暗示會引咎辭職，依家個局面會唔會有唔同呢？

連續兩周都有過百萬人上街遊行，奶媽同佢嘅管治團隊又一次醜出國際。對於正在同侵侵鬥法嘅習帝嚟講，真係添煩添亂，情何以堪！外媒已經話，港府暫緩修例係習帝掌權後最大嘅政治讓步，原本已經攞返個尾彩，但依家就因為奶媽嘅「權力的傲慢」而再遭嘲諷。香港嘅「土共」、建制派同奶媽嘅政治智囊，有無誤報「軍情」？有無盡上責任勸諫？有無誤判？喺風頭火勢仲要出嚟講嘢，激起民憤，係咪想曲線助民陣搞起遊行？相信好快中共喺香港嘅系統又會醞釀大執位。

北京若果繼續從緊處理香港問題，只會加劇香港人嘅離心，依家上街嘅係嚟自社會各個階層嘅人，已經係一個重大警號。即使北京話今次強推修例唔關佢事，但喺台灣人眼中，包括睇到一小撮惡形惡相嘅港警「開槍、掟彈」暴力對待示威者、奶媽繼續傲慢地拒絕落台等等嘅畫面，只會更加討厭大陸。諗深一層，香港人因抗拒大陸或唔相信大陸司法制度，而激起嘅反送中怒潮，已經成功令「一國兩制垂範台灣」，但呢次又係一次負面嘅「垂範」，台灣人唔想見到「今日香港，明日台灣」，肯定會同大陸越行越遠。

後記：
香港示威者真係垂範全球，經過昨日200萬人上街示威，到今早仍是秩序井然。最教人感動嘅係，示威者竟然在無人組織下，自發以集體討論嘅方式，決定結束佔領及堵塞馬路行動，還清除現場所有垃圾才離去，呢啲年輕人有理念、有行動理論同有獨立思想，最可貴嘅係佢哋肯聽取別人意見，有咁高嘅質素，點會係奶媽及盧一哥口中「暴動」嘅參與者！傳聞，北京對今次香港嘅反送中大遊行仍未定性，所以官媒《人民日報》、新華社都仲未有正式評論，但願北京唔好再錯判形勢，向香港人挑機！

花生評論員
-----------------------------
6月14日至22日 《GAME迷鬥一餐》
玩《小小金魚跳躍王》即有機會贏取 OUTBACK $100現金券
http://bit.ly/2HW1FUH
-----------------------------
【新聞有價】繼續撐蘋果
請往蘋果日報網站了解更多

【編輯推介】
唔想錯過兩岸最hit話題？快啲click嚟睇！
【引渡惡法】港府處理手法差劣 路透社：北京非常質疑林鄭能力
【飛越瘋人院】4精神病人喬裝出院雨夜狂奔 其中1人懂3國語言
【引渡惡法】港府暫緩修例 《紐時》：習近平掌權後最大政治讓步